AMARANTE desenvolve a súa actividade en tres campos de traballo: Educación para o desenvolvemento, Comercio Xusto e Consumo Responsable e mais Cooperación ao Desenvolvemento. Trátase de tres planos de actuación atravesados trasversalvemente por tres liñas de traballo orientadas á sensibilización social , á incidencia política sobre o sector público e privado  e á creación de alternativas socioeconómicas.

No campo da Educación para o Ecodesenvolvemento, Amarante puxo en marcha o  programa GALICIA CON VISTAS AO SUR, que a traves do Ciclo de Educación  XANELA ABERTA AO SUR, persegue formar e informar sobre a realidade do sur tanto na vertente formativo-teórica, como no posterior contacto con esas realidades. As Xornadas CONTRASTES, pola súa banda, pretenden achegar a realidade do Sur por medio da visita dos seus lideres.

O traballo no campo da educación complétase con diversas campañas informativas,  xornadas formativas ou exposicións e iniciativas de divulgación vehiculizadas arredor dos Centros de Recursos de Compostela, Pontevedra e Vigo.

Amarante ten asinado un convenio coa Universidade de Santiago de Compostela polo cal imparte formación e acolle as practicas das alumnas e alumnos do Master de Cooperación Internacional da USC. Así mesmo ten asinado un convenio para a formación coa Universidade de Vigo.

No campo de Comercio Xusto AMARANTE conta con tendas en Compostela, Ourense, Pontevedra e Vigo. Así mesmo temos diversos acordos de comercialización con varias organizacións e empresas como parte da iniciativa para asentar a primeira distribuidora galega de Comercio Xusto. A compra pública Ética é outra das nosas iniciativas centrada neste intre no impulso ao programa BO CAFÉ co que se pretende introducir café de Comercio Xusto nas maquinas de vending e cafetarías das institucións públicas.

Impulsamos e diriximos en Galicia a campaña  internacional ROUPA LIMPA, centrando a súa actividade na esixencia de transparencia e compromisos sociais ás multinacionais galegas do téxtil. Igualmente lideramos a Campaña FINANZAS ÉTICAS. No traballo da sensibilización en consumo responsable duas citas anuais son a Semana Galega de Comercio Xusto e as Xornadas de Alimentación e Consumo.

AMARANTE traballa no campo da  Cooperación ao Desenvolvemento cunha clara visión estructural, multisectorial e transformadora, con proxectos que centren os seus esforzos no empoderamento das comunidades do Sur a traves das súas organizacións sociais.

AMARANTE